ਗੁੜਤੀ | Initiation

ਬਾਬੇ ਦੀ ਗੁੜਤੀ ਸਫ਼ਰ ਦੀ, ਕਿਸੇ ਧੁਨ ਰਬਾਬੀ ਦਾ ਖਿਆਲ ਹੈ
ਹਾਂ ਖੋਜ ਵਿੱਚ ਕਿਸੇ ਇਲਮ ਦੀ, ਮੈਨੂ ਆਪ ਆਪਣੀ ਭਾਲ ਹੈ

ਪਿੰਜਰੇ ਦੇ ਟੁੱਕਰ ਨਿੱਤ ਦੇ,
ਝੂਠੇ ਦਿਲਾਸੇ ਜਿੱਤ ਦੇ
ਖੰਬਾ ਨੂ ਅੰਬਰ ਖਿੱਚਦੇ,
ਹੁਣ ਭਾਰੂ ਰੂਹ ਦਾ ਸਵਾਲ ਹੈ

ਹਾਂ ਖੋਜ ਵਿੱਚ ਕਿਸੇ ਇਲਮ ਦੀ, ਮੈਨੂ ਆਪ ਆਪਣੀ ਭਾਲ ਹੈ

ਸਾਗਰ ਚ ਲਹਿਰਾਂ ਜੁੜਦੀਆਂ,
ਪਰਬਤ ਤੇ ਬਦਲੀਆਂ ਉੱੜਦੀਆਂ
ਨਦੀਆਂ ਨੇ ਬਣ ਫਿਰ ਰੁੜਦੀਆਂ,
ਕੇਹੀ ਕੁਦਰਤ ਦੀ ਸੁਰਤਾਲ ਹੈ

ਹਾਂ ਖੋਜ ਵਿੱਚ ਕਿਸੇ ਇਲਮ ਦੀ, ਮੈਨੂ ਆਪ ਆਪਣੀ ਭਾਲ ਹੈ

ਕਰ ਝੂਠੇ ਮੁਜ਼ਾਹਰੇ ਰੋਸ ਦੇ,
ਪਏ ਫੁੱਲਾਂ ਨੂ ਗਹਿਣੇ ਔਸ ਦੇ 
ਭੁਲੇਖੇ ਪੈਣ ਫ਼ਿਰਦੋਸ ਦੇ,
ਖਿੜੀ ਹਰਸੂ ਵੱਖਰੀ ਨੁਹਾਰ ਹੈ

ਹਾਂ ਖੋਜ ਵਿੱਚ ਕਿਸੇ ਇਲਮ ਦੀ, ਮੈਨੂ ਆਪ ਆਪਣੀ ਭਾਲ ਹੈ

ਮੈਂ ਜੀਓਂਦੇ ਬੁਤਾਂ ਤੋਂ ਨੱਸਿਆ,
ਫਿਰ ਇੱਕ ਰਾਜ਼ ਆਲਮਾਂ ਦੱਸਿਆ
ਬਲਿਹਾਰੀ ਕੁਦਰਤ ਵਸਿਆ,
ਸਭ ਉਸਦਾ ਜਾਹੋ ਜਲਾਲ ਹੈ

ਹਾਂ ਖੋਜ ਵਿੱਚ ਕਿਸੇ ਇਲਮ ਦੀ, ਮੈਨੂ ਆਪ ਆਪਣੀ ਭਾਲ ਹੈ

ਉਮਰਾਂ ਦੇ ਪੈਂਡੇ ਸਾਹ ਦੇ,
ਮੀਲਾਂ ਦੇ ਪੈਂਡੇ ਰਾਹ ਦੇ
ਅਸੀਂ ਘੱਲੇ ਬੇਪਰਵਾਹ ਦੇ,
ਤੇ ਬੇਪਰਵਾਹੀ ਚਾਲ ਹੈ

ਹਾਂ ਖੋਜ ਵਿੱਚ ਕਿਸੇ ਇਲਮ ਦੀ, ਮੈਨੂ ਆਪ ਆਪਣੀ ਭਾਲ ਹੈ


© Copyright @ Taran 2023